4/3/08

Por un PXOM transparente. Por unha nova exposición ao público: Pleno Cidadán

O luns 3 de marzo, coincidindo coa celebración dun Pleno ordinario do Concello, nós celebramos de xeito paralelo un “Pleno Cidadán”. O motivo deste acto da Plataforma era o de denunciar a indefinición que está a haber no proceso de tramitación do Plan Xeral, debido á falta de transparencia por parte do Concello: as máis de 6000 alegacións presentadas polos veciños e veciñas inda están por respostar e non se ten información oficial de cando se vai a proceder á aprobación provisoria do Plan e a resposta ás alegacións. Nós consideramos que do que se debe estar a falar no Concello é das alegacións e dos cambios que se introduciron no documento inicial, así coma da súa nova exposición ao público logo das modificacións considerábeis que ao parecer se fixeron. Por isto, organizamos un pleno moi particular: media hora antes da convocatoria de pleno da corporación municipal, nós convocamos o “Pleno Cidadán”: os colectivos que integran a plataforma fixeron unha exposición resumida das alegacións presentadas por cada un deles, facéndose ouvir alí por uns políticos moi “particulares”: como se pode ver nas imaxes, o Sr. Alcalde acompañado dos seus concelleiros do goberno o Sr.Besteiro e Sr.Liñares, así coma os voceiros dos grupos da oposición, o Sr. García Díez e o Sr. Lage Suárez estaban tamén alí, algún deles moi preocupado polo futuro duns terreos pendentes de recualificar…

Así pois, deu comezo un Pleno Cidadán no que se expuxeron as medidas a tomar: respecto ás edificacións xa existentes e á fisonomía dos barrios, a situación da Pranta de Compostaxe, a entrada do AVE, a protección das carballeiras e dos cauces fluviais e conservación das ribeiras do Miño, a eliminación desa nova “autovía” coa que se proxectaba unir O Ceao coa Louzaneta, o crecemento proporcionado dos núcleos rurais e a protección e catalogación do Camiño Primitivo ao seu paso por Lugo foron as reivindicacións que se presentaron, ante a atenta mirada dun nutrido grupo de concorrentes.

Semella que a realización deste acto de protesta non caeu en saco roto: pouco despois, no pleno oficial, os tres grupos políticos con representación no Concello acordaban o sometemento a aprobación provisoria en abril… a ver se desta vai.

Dende a Plataforma “Lugo: a mellor cidade do mundo!!!” seguiremos a demandar transparencia e información á cidadanía, unha nova exposición ao público para que os veciños e veciñas saiban que modificacións se introduciron no PXOM e en que medida lles afecta e a resposta ás alegacións que presentaron.

Por iso nos manteremos vixiantes e continuaremos a realizar actos de protesta coma este pasado “Pleno Cidadán”, pedindo que os cidadáns e cidadás coñezamos o Plan antes de que sexa aprobado, demandando que as decisións tomadas traspasen os muros do Concello e que se teñan en conta os verdadeiros intereses dos veciños e veciñas do concello de Lugo e non só os duns poucos.

2/2/08

Moita asistencia e moito debate sobre o PXOM

Coa asistencia dunhas 400 persoas, o xoves 24 tivo lugar no Instituto Politécnico o primeiro acto da plataforma 'Lugo: a mellor cidade do mundo', convocado por ADEGA, Amigos do patrimonio de Castroverde, O Carballo, Asociación pola defensa do Parque Rosalía, Valle-Inclán, Federación de Asociacións Veciñais, LugoPatrimonio e UNAVE (Unión de Asociacións Veciñais). Nel coñecimos a perspectiva que do PXOM teñen os veciños, as carencias medioambientais que presenta, a problemática dos Parques Rosalía e Marcos Cela ou a conservación do patrimonio.

Ante a falta da información sobre o novo PXOM, tralos cambios sustanciais ó que foi sometido pola nova configuración do goberno municipal, a plataforma xurde pola necesidade de coñecer estas modificacións así como pola falta de resposta as máis de 6.000 alegacións presentadas polos veciños. 'Lugo: a mellor cidade do mundo!!!' xurde tamén para ser lugar de encontro e punto de debate permanente do movemento asociativo lucense, para transmitir ós seus representantes o modelo que queremos para a nosa cidade.

Ó acto foron invitados os 25 concelleiros do equipo de goberno e entre os asistentes se atopaban representantes do Partido Popular, BNG e Esquerda Unida, se ben non asistiu ningún concelleiro do PSOE. Dicir que tamén se botou en falta a presencia de representantes das Consellerías de Política Territorial, Vivenda ou Cultura, que tamén foron invitados ó acto.

Tralas exposicións dos membros das asociacións e do presidente do Colexio de Arquitectos, tivo lugar un amplio turno de intervencións e debate entre os asistentes.

20/1/08

Lugo: a mellor cidade do mundo!!!

Lugo e os lucenses deixamos pasar moitas oportunidades:
Agora mesmo estamos a deixar pasar a oportunidade de facer un Plan Xeral ambicioso e ilusionante que faga da nosa cidade unha cidade mellor: A MELLOR CIDADE DO MUNDO!!!

¿Sabes que está a piques de aprobarse o Plan Xeral (PXOM) con máis de 6000 alegacións dos veciños sen contestar e con profundas modificacións que descoñecemos?

Temos exemplos de cidades do noso tamaño que experimentaron unha tremenda mellora grazas ó seu plan xeral e ó impulso dos seus políticos, técnicos e cidadáns: Santiago, Pontevedra, Allariz, Oleiros...

nós, como cidadáns ¿podemos facer algo?

Claro que si: demandando MOITÍSIMA CALIDADE NO ESPAZO URBANO no CONXUNTO DA CIDADE (tan importante é Albeiros, Montirón ou As Gándaras como a Praza Maior) e participando pensando no colectivo, no interese xeral de todos nós (non tan só en cómo vai quedar a miña leira ou o meu solar).

¿que propomos?
  • Queremos transparencia, intelixencia, sensibilidade e respecto por parte dos que deciden, para que se faga unha cidade agradable e ordenada (non semella tan difícil facelo ben como en Santiago, Pontevedra, etc.).
  • Queremos transparencia, intelixencia, sensibilidade e respecto por parte dos que deciden, para que se faga unha cidade agradable e ordenada (non semella tan difícil facelo ben como en Santiago, Pontevedra, etc).
  • Queremos unha cidade próxima, amiga, compacta e sostible (limpiemos e ordenemos o que xa temos e medremos con sentido).
  • Queremos que a nosa cidade manteña a súa identidade, cos mesmos barrios e o mesmo xeito de vivir neles, mellorándoos: con prazas onde falar co veciño ou veciña, con parques onde xoguen os nenos e nenas, con bibliotecas, garderías, centros cívicos e sociais, espazos para a bici, o deporte e o lecer.
  • Queremos MOITÍSIMA CALIDADE: URBANISMO e non especulación. ARQUITECTURA e non construción, ou sexa: DESEÑO e PLANIFICACIÓN e non improvisación.
  • Queremos que o PXOM asuma o Plan Estratéxico recollendo equipamentos e infraestruturas que nel aparecían: solo industrial, auditorio, planta de compostaxe, museo da romanización, estación intermodal, soterramento do tren, novas pontes, convivencia co río, comisión de estética urbana...
  • Queremos un plan arqueolóxico que destaque e poña en valor un dos nosos sinais máis identificativos.
  • Queremos un estudo do medio rural onde siga primando a súa esencia, e non o que aconteceu con San Fiz (Montirón).
  • Queremos un transporte público e privado equilibrado e respectuoso.
  • Queremos protexer todo o bo que temos e nos fai sentir a gusto na nosa cidade: a muralla e o seu entorno, o casco vello, o río, a identidade dos barrios, as carballeiras, os camiños (o Camiño Primitivo), a importancia das hortas, o respecto polo Parque Rosalía, a preservación do Parque Marcos Cela e unha solución imaxinativa e de calidade para o barrio do Carme.
  • Queremos o mellor para todos nós: que Lugo sexa A MELLOR CIDADE DO MUNDO!!!

¿queres axudarnos?

Xa nos estás axudando lendo isto: grazas. Pero habería que facer algo máis, ¿non si? Cantos máis sexamos mellor, máis fácil será facer ese Lugo que queremos. Non te acomodes, nin te resignes.

anímate e ven!!!

O próximo XOVES 24, ÁS 20:00 HORAS NO SALÓN DE ACTOS DO INSTITUTO POLITÉCNICO (rúa Armando Durán), falaremos do PXOM do ano 1991, do PXOM que está en redacción, de cómo afectaron e afectarán a túa vida e de qué podemos facer para que a situación mude. GRAZAS: Contamos contigo.